O Centro de Emprendemento “A Estación” é un espazo multifuncional que alberga unha zona de traballo coworking para proxectos emprendedores e empresariais.
Nas últimas entradas deste blogue falamos de moito máis que de oficinas. Falamos de planificación estratéxica en A Proa, de ideas de negocio sostible en Miño, de obradoiros alimentarios en Brión e de transformación gandeira en Baroña. Aparecen modelos produtivos, estruturas, procesos e tamén moito traballo invisible.
Pero detrás de toda esa arquitectura hai unha pregunta que raramente formulamos de xeito explícito: ¿Que entendemos realmente por éxito cando emprendemos?
O éxito mais alá dos resultados
No emprendemento é habitual asociar o éxito a chegar a un punto concreto: facturar unha cifra, lanzar un produto ou consolidar unha marca. Esa visión está moi presente cando falamos de obxectivos trimestrais ou de ideas con potencial.
Mais a experiencia nos nosos espazos amosa algo distinto: hai proxectos “perfectos” sobre o papel que esgotan a quen os sostén, e outros máis modestos que, pola contra, dan vida. Para entender isto, resulta útil introducir a mirada da logoterapia.
Que é a logoterapia e que nos ensina?
A logoterapia é unha corrente psicolóxica desenvolvida por Viktor Frankl, psiquiatra austríaco, a partir da súa experiencia extrema como prisioneiro nos campos de concentración nazis, entro outros estivo en Auschwitz. Nun contexto onde todo parecía perdido, Frankl observou que as persoas que atopaban un sentido —un “para que”— tiñan máis capacidade para resistir e reconstruírse.
A súa conclusión foi revolucionaria: o motor principal da vida non é o pracer nin o éxito externo, senón a procura de sentido. Desde esta perspectiva, o éxito non se define polo que se consegue, senón pola coherencia entre o que facemos e o sentido que ten para nós.
Emprender con sentido na nosa Rede
Se levamos esta idea á realidade da nosa Rede de Coworking, a lectura do emprendemento cambia. Un proxecto será exitoso cando:
Permite sentirse útil e coherente: Como as experiencias de economía azul en Miño ou a cociña colaborativa en Brión, que revalorizan o saber tradicional e o territorio.
Estea aliñado cos valores: Como vemos en Baroña, onde o éxito non é só a venda de carne, senón a protección do monte e o respecto polas razas autóctonas.
Sexa sostible a nivel vital: Como propoñemos dende A Proa, dividindo o ano en etapas para non queimar a enerxía no primeiro mes.
O papel do espazo compartido
Desde esta óptica, un coworking non é só un lugar con wifi. É un contexto que axuda a poñer orde e a relativizar expectativas. Compartir o día a día con outras persoas que tamén están a reformular os seus proxectos permite entender que non todo avance é visible e que revisar o rumbo non é un fracaso, senón un síntoma de madurez.
Unha idea de éxito mais habitable
A logoterapia non nos pide renunciar aos resultados, senón cambiar o foco: primeiro o sentido, despois o éxito como consecuencia.
Nun momento no que a Rede medra con novos nodos e modelos de negocio, cómpre reservarmos un espazo para preguntarnos: ¿Este proxecto ten sentido para min? ¿Estou construíndo algo no que me recoñezo?
Responder a estas preguntas tamén é unha forma de avanzar. Porque, ao final, o éxito máis sólido non é chegar antes, senón chegar sen perderse polo camiño.
