Espazos de traballo colaborativo da rede provincial en As Pontes.
As Pontes estase a consolidar como un referente na transformación industrial e enerxética, nun proceso de transición que combina reindustrialización, innovación e oportunidades de negocio, sen perder de vista o valor do seu ámbito rural e a súa contorna territorial.
No corazón desta dinámica atópase o Green Coworking, o espazo de traballo colaborativo impulsado por SEARA e integrado na Rede de Espazos de Coworking da Deputación da Coruña. Este proxecto ofrece ás persoas emprendedoras e empresas un lugar moderno e funcional para desenvolver as súas iniciativas, con zonas de traballo compartidas, salas de reunións e formación, ademais de acompañamento e asesoramento empresarial.
Máis alá das infraestruturas, o Green Coworking dinamiza o tecido empresarial das Pontes e da comarca de Ferrolterra a través de actividades formativas e apoio á innovación, contribuíndo á creación de actividade económica nun territorio en plena transformación. Ademais, o espazo promove encontros e sesións de networking que conectan as empresas do Green Coworking coas empresas que forman parte do tecido empresarial das Pontes e a súa comarca, fomentando sinerxías e novas oportunidades de negocio.
Como zona de transición, As Pontes conta con importantes oportunidades de apoio ao emprendemento e á reindustrialización. Os Fondos de Transición Xusta, activados pola Xunta de Galicia, buscan impulsar novos proxectos empresariais e consolidar iniciativas existentes no municipio e na súa área de influencia.
No ámbito da formación e o emprego, o programa Activa Verde está orientado a mellorar as competencias profesionais e a empregabilidade das persoas, especialmente vinculadas á transición ecolóxica e ás necesidades do tecido produtivo local.
Ademais, as empresas e persoas emprendedoras poden acceder ás axudas Leader do GDR Seitura 22, destinadas a proxectos que dinamicen o medio rural, así como a outras liñas de apoio específicas para o emprendemento e a implantación de actividades económicas no rural galego.
Con iniciativas como o Green Coworking e estas liñas de axuda, As Pontes avanza como unha zona de transición con visión de futuro, conectando industria, innovación e desenvolvemento rural sostible.
