Centro de Transformación Agroalimentaria dos municipios de Moeche, San Sadurniño, Cerdido, Valdoviño, Narón, Cedeira e As Pontes
1. Alumnado do CPI de San Sadurniño prepara exquisitos petiscos con produtos da Fusquenlla
O alumnado de 4º da ESO do CPI de San Sadurniño pasou o pasado 26/01/2024 entre fogóns participando nun obradoiro de cociña conducido polo chef Alejandro Iglesias, do restaurante-tapería Dúas liñas de Arzúa. Este restaurante iniciou a súa andaina antes do verán cun compromiso decidido pola elaboración de pratos innovadores e da máxima calidade botando man de produtos de quilómetro cero. En San Sadurniño, Iglesias e as mozas e mozos do CPI puxeron en práctica esa filosofía empregando, entre outros, kétchup, salsa doce de pementos e zume de mazá saídos do Centro de Transformación Agroalimentaria A Fusquenlla.
A idea xurdiu dunha proposta do Fondo Galego de Cooperación e Solidariedade, quen está desenvolvendo coa rapazada e a mocidade o proxecto europeo “People&Planet”, de cara a implicar a xente nova no necesario cambio cara á sostenibilidade ambiental e social. Neste sentido, a través da preparación dos platos con materia prima local, o alumnado descubriu a importancia dunha alimentación equilibrada e saudable, pero tamén de apostar polos produtos de proximidade.
Foto: o chef Alejandro Iglesias no obradoiro de cociña co alumnado
2. A Fusquenlla no Encontro de Obradoiros compartidos celebrado en Vilarmaior
Os pasados 2 e 3 de febreiro, o albergue de ecoturismo Alvarella, situado en Vilarmaior, acolleu o encontro profesional organizado polo Sindicato Labrego Galego para mostrar distintas experiencias de traballo compartido coas que fomentar a reactivación produtiva do rural.
O programa abordou cuestións tan diversas como a importancia socioeconómica dos obradoiros que se están poñendo en marcha -como é o caso do centro colaborativo A Fusquenlla-, os aspectos sanitarios e fiscais ou incluso os modelos organizativos que mellor resultado poden dar para o seu funcionamento, vendo para iso exemplos de espazos pertencentes á Rede Coworking da Deputación da Coruña e doutros puntos do Estado.
Os produtos incorporados foron: zume de mazá e tomate confeitado elaborados por “Bieiteiras”, xunto con delicias de pemento da firma “Ay Carmen!”, que tamén está sacando preparados das instalacións de Moeche a partir dos seus propios cultivos.
3. Cedeira, Narón e As Pontes formalizan a adhesión á Fusquenlla
O pasado 14/02/2024 representantes dos gobernos locais de Cedeira, Narón e As Pontes asinaron en Moeche o seu compromiso de adhesión ao proxecto do Centro de Transformación da Fusquenlla. Desta xeito xa son sete os municipios implicados na xestión deste espazo compartido. A Fusquenlla procura a ser o referente no norte da provincia para a elaboración de distintos tipos de envasados de froita, horta e mel, así como un polo de dinamización económico baseado na transformación de excedentes da máxima calidade, ademais de todas as garantías sanitarias e de trazabilidade alimentaria.
O Centro estase a integrar, con determinación, na estratexia do Xeoparque do Cabo Ortegal como unha das iniciativas “bandeira” en canto á promoción do desenvolvemento local que deben poñer en práctica os territorios UNESCO.
4. Inicio do cuarto curso da Fusquenlla
A Fusquenlla iniciou o 15/03/2024 unha nova acción formativa para capacitar ás produtoras e produtores da comarca tanto no manexo do equipamento como nas técnicas de transformación e envasado alimentario. Trátase do cuarto curso deste tipo que se ofrece co obxectivo de seguir ampliando a base social dun proxecto co que se busca dinamizar a economía da zona apostando polos produtos de proximidade, da máxima calidade e con todas as garantías sanitarias.
Foto: representantes dos concellos adheridos visitando A Fusquenlla
Neste primeiro curso de 2024 participan un total de 20 persoas, admitidas a partir do listado de agarda das solicitudes rexistradas ata ese momento. Conta con 3 xornadas de 4 horas teóricas que se desenvolveron no mes de marzo na Casa da Xuventude de San Sadurniño e 4 xornadas de 4 horas eminentemente prácticas que se desenvolverán no mes de abril no obrador da Fusquenlla. Esta formación de 28 horas de duración habilitará ás persoas que a realicen, e superen un exame final, para poder transformar no Centro xa que abordan temáticas fundamentais para o proceso de transformacións como a hixiene e manipulación de alimentos, a contaminación dos alimentos e as intoxicacións alimentarias, a desinfección, a trazabilidade e a prevención de riscos laborais, entre outros.