![](https://redecoworking.pel.gal/wp-content/uploads/2023/12/A-ESTACION-VEDRA_AZUL-FONDO-BLANCO.png)
Espazo de coworking ubicado no Concello de Vedra.
Actualmente podemos dicir, porque é evidenciable, que existe unha multitude de sistemas de organización de persoas e recursos, con independencia de que o noso proxecto de negocio sexa xuridicamente individual ou colectivo. En calquera caso, incluso para quen traballa pola súa conta, a dinámica empresarial e de mercado impón unha serie de relacións persoais con provedores, clientes, etc.
Segundo organicemos os factores (humanos, materiais, económicos) que conforman o noso proxecto, para a consecución das nosas metas e obxectivos, o resultado que obteremos será un ou outro.
![](https://redecoworking.pel.gal/wp-content/uploads/2023/11/calidade.jpg)
Os sistemas de calidade
Dentro deses sistemas existentes de organización empresarial atopamos os denominados sistemas de xestión da calidade. Eses sistemas poden ser froito do traballo propio, do traballo de consultorías e asesorías externas.
Os sistemas non é necesario que partan de sistemas formais certificables xeralistas (normas ISO, etc.), pero é evidente que tomalas como referencia pode axudarnos no deseño e configuración dos mesmos.
As certificacións
Os sistemas de xestión de calidade certificables son sistemas potencialmente válidos para todas as organizacións, que deben adaptarse a cada unha delas. A deficiente adaptación implicará que esa potencialidade non sexa aproveitada e supoña máis un lastre ca unha vantaxe. É dicir, inda que cara fóra pareza que todo funciona, pode ser unha mera pantalla que camufle unha “non-calidade” evidente.
Pero retomando o fío, hai que dicir que as certificacións de calidade poden implicar unha serie de vantaxes a nivel competitivo, debido a que teñen posibilidade de incidir tanto a nivel interno como externo.
A certificación implica que unha entidade (acreditada para facelo e, por tanto, enténdese que imparcial e obxectiva) comproba e da o seu visto e prace para que unha empresa, profesional ou outro tipo de entidade, sexa recoñecida publicamente por cumprir cunhas normas de calidade.
![](https://redecoworking.pel.gal/wp-content/uploads/2023/11/de-abaixo-arriba.jpg)
O modelo teórico e o seu choque coa realidade
O gran problema dáse en non poucos casos cando imos á realidade. Se ven certos negocios poden precisar/necesitar certificacións en calidade para desenvolver legalmente a súa actividade, moitas empresas ou profesionais son atraídas polo suposto prestixio que supón estar certificado en materia de calidade, pensando que iso permitirá atraer nova clientela, etc.
A realidade pode levarnos a unha valoración crítica: os sistemas de calidade certificables dificilmente son implantados de abaixo a arriba, pola propia dinámica dos mesmos. Esta opinión deriva do feito de que o habitual é saltarse a fase de adhesión a un sistema: alguén que manda na empresa ou entidade decide que se implante un sistema certificable, pero é viable dentro da dinámica da propia organización?
En moitos casos, tras un breve achegamento ao equipo humano que debe lidiar co sistema de calidade no día a día, pásase á burocracia que supón a súa implantación formal, moitas veces de forma rupturista e sen apoio por parte das persoas que deben participar dese sistema. Por tanto, son sistemas pouco orgánicos; máis de forma que de fondo.
A letra pequena
Máis aló dos “pros”, que evidentemente os hai, é importante deterse nos “contras” porque adoitan a non verbalizarse abertamente.
A nivel interno da/o profesional ou empresa os contras son ou poden ser varios. Centrarémonos en dous.
- En primeiro lugar, atoparse inmerso/a nun sistema de funcionamento que precisa da evidencia constante, polo que xera nas persoas escaso interese (vese como unha complicación engadida non como a vantaxe que podería ser) fartazgo, ou incluso rexeitamente aberto.
- En segundo lugar, que non se fagan as cousas mellor ca antes, e se prime aparentar (un risco moi grande a nivel de torpedear a implicación persoal das persoas co negocio).
A nivel externo indicaremos outros dous:
- Que non se saiba sacarlle partido á certificación, e non exista realmente ese recoñecemento público que permita obter máis clientes, mellorar o “caché”… Hai unha enorme carencia de formación en como aproveitar o feito da certificación para xerar valor engadido, non tanto nas grandes empresas, senón nos pequenos negocios.
- Que en actividades e sectores onde non é requisito imprescindible, poida chegar a verse que a certificación non é sinónimo de calidade real, senón un mero paripé.
Para rematar simplemente indicar unha pequena frase feita que resulta aplicable a esta materia (e a moitas máis a nivel de negocio, como a capacitación do persoal, a tecnoloxía dispoñible, etcétera, etcétera): o importante non é tanto o que se ten, senón como se usa.